35ng housing units kan GK asin Govierno Provincial pigbasbasan sa Del Gallego
PILI, CamSur—Dinagsa nin dakol na namamanwaan kairiba kan mga opisyales lokal kan municipio kan Del Gallego an ginibong pagbasbas sa 35ng housing units na pigkonstruir sa pagtarabangan kan Gawad Kalinga (GK) asin govierno provincial sa pamamayo ni Gobernador LRay Vilafuerte kan Mierkules, Hulyo 28.
An sinambit nang pagbasbas pig-konducir ni Rev.Fr. Ian Trillanes kan parokya kan Del Gallego. Si Alkalde Lydia Abarientos kan sinambit nang banwaan presente man sa okasyon.
Apuera kan loteng pigdonar kan govierno provincial, an gastos sa patrabaho para sa pagpatindog kan mga units an pigsagot pa giraray kaini.
Crew supervisors, katabang sa harong, para-aling asin hardinero kakalapon kan CamSur Employment Center
Liwat na naman na maarangkada puon sa aga, fetsa 29, hasta fetsa 31 kan Hulio, an pagkalap nin mga obrero para sa manlaen laen na posisyon sa ibang nacion sa Capitolio Provincial kan Camarines Sur sa pangengenot kan Camarines Sur Employment Center (CSEC).
100 na lalaking Crew Supervisors an kinakaipuhan kan Al Ahlia Restaurant (Americana) sa Kingdom of Saudi Arabia. An mga aplikante kinakaipuhan na graduado nin BS HRM o kayâ nin ibang kabaing na apat na taon na kurso, edad 21 hasta 28 anyos, aram an marhay na pagtrato sa mga kliyente, may kalidad kan sarong lider asin marhay sa lenguaheng Ingles. Igwa nin balidong pasaporte.
Mientras tanto, kinakaipuhan man an mga katabang sa harong, para – aling asin mga hardinero para sa nacion kan Romania. Mas bentahe kun an mga aplikante sa huring nasambit na posisyon mag-agom.
Naogma si Gob. LRay Villafuerte sa pag-omaw saiya ni PNoy sa SONA
PILI, CamSur – May dikit na pagka-ngalas pero makatabang puso na kaogmahan an ipinahayag ni Gob LRay Villafuerte kan espesyalmenteng pagsambit saiya ni Presidente Noynoy Aquino sa pinag-deliver kaining State of the Nation Address o SONA durante kan inaugural joint session kan 15th Congress kan Lunes na hapon.
Sa kadakul-dakul na mga provincia asin iba pang mga bantugan na mga lideres sa enterong nacion, saro si Gob. LRay sa mga nagkapira sanang mga opisyal na naunambitan ni Presidente Aquino sa saiyang pinaka-primerong SONA.
Sa sarong interview, sinabi ni Gob. LRay na minatubod siya na an espesyalmenteng pag-mencionar saiya kan Presidente nagin resulta kan saiyang pagbisita ki PNoy sa Malacañang mga duwang semana pa sanang nakakalihis tanganing i-presentar man an saiyang mga ideya kun pano makakatabang sa sarong problema o pangangaipo kan govierno nacional.
Mayor Lacoste kan Buhi bagong presidente kan League of Municipalities, CamSur
PILI, CamSur—Si Mayor Rey P. Lacoste kan Buhi iyo ngonian an bagong presidente kan League of Municipalities (LMP) Camarines Sur Chapter resulta kan pirilian na ginibo sa Villa Caceres, Ciudad nin Naga kan Martes na aga, Hulyo 27 sa pagtiripon kan mga alcalde kan provincia.
An bagong LMP president, CamSur Chapter, na si Mayor Lacoste na kaalyado ni Gob. LRay Villafuerte, nanggana sa paagi kan aklimasyon (acclamation) nin huli kan suporta kan mayoriya kan mga alcaldeng presente sa nasambit na pagtiripon.
Si Mayor Lacoste tolos man na nagpasalamat sa mga mayors na nagsuporta saiya. An bagong presidente kan LMP maserbe nin tolong taon sa nasambit na liga.
|
