Mga paraoma, parasira nag-training sa pagpadakol kan produksyon

PILI, CamSur - An importansya kan team building asin values formation an mga mayor na tema sa ginigibong social preparation training para sa mga benepisyaryo kan proyektong food productivity na pigpundohan kan European Union, sarong international organisasyon na nagtatabang sa mga developeding countries na kabali an nacion kan Pilipinas.

Maabot sa otso mil (8,000) na rice farmers, vegetable growers, livestock raisers asin parasira sa mga target barangay sa banwaan nin Ocampo, Buhi, Sagñay asin Tigaon an makikinabang kan proyektong ini.

An social preparation training sarong importanteng elemento tanganing mapakarhay an pagmanehar kan proyekto kan mga benepisyaryo. Sa training, pigtutukdoan an mga benepisyaryo na mag-organisar siring kan sarong cooperative tanganing an mga miembro asin opisyale kaini magkaigwa nin dayupot na iribahan asin tarabangan.

An mayor na katuyuhan kan proyekto an mapadakol kan produksyon sa maniba-ibang sector kan agrikultura arog kan paroy, livestock, mais, asin iba pang high value commercial crops, seaweeds asin mga sira arog kan tilapia na minaresulta sa mas halangkaw man na ingreso para sainda.

Si Gobernador LRay Villafuerte pigtatawan nin halangkaw na prayoridad an pag-uswag kan agricultura ta ini dakula an kontribusyon sa pag-asenso asin prosperidad kan provincia.

Maabot na sa pitong (7) batch o grupo nin benepisyario an nag-agi sa training  asin na-organisa na sa mga  barangay kan nasambit na mga banwaan.  

An  jefe kan Provincia Planning Office, si Lovenia Tolosa, iyo an focal person kan proyekto na pigpunduhan kan EU asin responsibilidad niya an pag-koordinar kan aktividad manonongod sa programang ini. Stn/mmec

Comments (0)