Naogma si Gob. LRay Villafuerte sa pag-omaw saiya ni PNoy sa SONA

PILI, CamSur – May dikit na pagka-ngalas pero makatabang puso na kaogmahan an ipinahayag ni Gob LRay Villafuerte kan espesyalmenteng pagsambit saiya ni Presidente Noynoy Aquino sa pinag-deliver kaining State of the Nation Address o SONA durante kan inaugural joint session kan 15th Congress kan Lunes na hapon.

Sa kadakul-dakul na mga provincia asin iba pang mga bantugan na mga lideres sa enterong nacion, saro si Gob. LRay sa mga nagkapira sanang mga opisyal na naunambitan ni Presidente Aquino sa saiyang pinaka-primerong SONA.

Sa sarong interview, sinabi ni Gob. LRay na minatubod siya na an espesyalmenteng pag-mencionar saiya kan Presidente nagin resulta kan saiyang pagbisita ki PNoy sa Malacañang mga duwang semana pa sanang nakakalihis tanganing i-presentar man an saiyang mga ideya kun pano makakatabang sa sarong problema o pangangaipo kan govierno nacional.

An pangyayaring ini lalo sana man na mina-kumpirmar na an joven na gobernador kan CamSur saro na man na iginagalang asin pigdadangog sa haralangkaw na lado kan govierno maski ngani siya saro pa sana man na pamayo nin govierno local.

Si Gob. LRay iyo ngonian an executive vice president kan League of Provinces of the Philippines, an opisyal na organisasyon kan gabos na mga gobernador sa nacion, kun sain siya nag-serbi na man bilang deputy secretary general kan primero pan sana siyang ma-elihir bilang governador kan taon 2004 asin bilang national chairman kan siya ma-reelect kan 2007 asin mina-orar pa sana bilang executive vice president kaibahan an ibang mga opisyal kaini kan nakalihis na semana  pa sana.

Pigsaysay ni Gob LRay na maski na ngani igwa siyang dikit na pag alangan ta nagsuporta siya ki Senator Villar kan nakalihis na pirilian, huminagad siya nin halipot na appointment sa presidente nin maski limang minuto man lamang ta may kaisipan siyang gustong i-presentar.  Nagpaiba siya sa saiyang kapwa gobernador na sinda Gob. Alfonso Umali na iyo an presidente kan LPP asin Gob. Carlos Jericho Petilla na mga taga Liberal Party.  Marhay man si pag-resibi kan Presidente saiya, na mala ngani si hinahagad niyang limang minuto uminabot nin apat na oras, pig-treat pa siya nin lunch asin pig-tour sa palibot kan Malacañang.

An ideya kan gobernador iyo an inaapod niyang counterpart scheme entre nin mga gobierno local asin an gobierno nacional.

Saiyang ipig-halimbawa an manonongod sa kakulangan nin mga classroom, sarong problema na lakop sa enterong Pilipinas.  Halimbawa daa an CamSur mag-raise ni 25 million ngonian na taon asin ini taparan kan govierno nacional nin kaparehong kantidad, kaya na kaini ma-resolberan an kakulangan nin mga classroom sa provincia.  Kun ini duplikaron sa gabos na 80ng provincia, 150ng ciudad asin 1,500 na mga munisipyo na mag-raise man kan kaya nindang kantidad, puwedeng maka-bilog nin 8ng bilyon na pag-tinaparan kan gobierno nacional nin otro pang 8ng bilyon, kaya nang maresolberan ang problemang kakulangan nin classroom sa entrong nacion.

Puwede man adaptaron an sistemang ini sa iba pang mga problema kan Pilipinas arog kan irigasyon, farm to market roads, salud asin iba pang kakulangan pinansiyal.

Inapreciar man kan presidente an saiyang kaisipan, mala ngani ta ibinali pa an ideyang ini ni Gob LRay asin pigtawan reconocimiento an LPP sa saiyang SONA.  Inomaw kan Presidente an inisyatibo ni Gob. LRay na pagduman sa Malacañang bako ta may hinahagad kundi sa pagtabang.

Sa lado man ni Gob. LRay, kumbinsido man daa siya na si Presidente Noynoy talagang sinsero sa saiyang mga programa na bagohon asin linigan an govierno asin padalaganon ini nin mayong kolor politika.  (GBClaveria/MMEC)

Comments (0)